काठमाडौं ।सानिमा मिडिल तमोर हाइड्रोपावर लिमिटेडको दशौं वार्षिक साधारण सभा बुधबार कुण्डलिनी दरबार ब्याङ्क्वेट, चण्डोल, काठमाडौंमा सम्पन्न भएको छ।
सभामा कम्पनीका सञ्चालक, शेयरधनी, लगानीकर्ता, लेखापरीक्षक तथा सरोकारवाला निकायका प्रतिनिधिहरूको उल्लेखनीय उपस्थिति रहेको थियो।
कार्यक्रमको प्रारम्भमा कम्पनीका सञ्चालक समितिका अध्यक्ष विनय कुमार श्रेष्ठले विगत एक दशकमा कम्पनीले गरेको उपलब्धि, चुनौती र आगामी रणनीतिबारे विस्तृत प्रस्तुति दिएका थिए।
प्रतिवेदन र वित्तीय विवरण पारित
सभामा सञ्चालक समितिवाट प्रस्तुत दशौं वार्षिक प्रतिवेदनमाथि विस्तृत छलफल गरी सर्वसम्मत रूपमा पारित गरिएको थियो।
त्यससँगै आ.व. २०८१/०८२ को लेखापरीक्षण प्रतिवेदन, २०८२ असार मसान्तसम्मको वित्तीय विवरण, नाफा–नोक्सान हिसाब, नगद प्रवाह विवरण र सम्बन्धित अनुसूचिहरू पनि पारित गरियो।
सभाले लेखापरीक्षण समितिले सिफारिस गरे बमोजिम आर्थिक वर्ष २०८२/ ०८३ को लागि लेखापरीक्षकको नियुक्ति गर्ने तथा पारिश्रमिक निर्धारण गर्ने, एक जना स्वतन्त्र सञ्चालकको नियुक्ति गर्ने लगायतका विविध प्रस्ताव पारित गर्याे ।
अध्यक्ष श्रेष्ठका अनुसार कम्पनीले पछिल्ला वर्षहरूमा उत्पादन क्षमता र व्यवस्थापन दक्षता दुवैमा उल्लेखनीय सुधार ल्याएको छ।
उनले भने, “हामीले परियोजना सञ्चालनमा ल्याएर राष्ट्रिय ग्रिडमा विद्युत् आपूर्ति बढाएका छौं। अब कम्पनीले वितरण प्रणाली सुदृढीकरण र नवीकरणीय ऊर्जामा लगानी विस्तार गर्ने योजना बनाएको छ।”
शेयरधनीहरूको जिज्ञासा र सुझाव
सभामा सहभागी शेयरधनीहरूले लाभांश वितरण, नयाँ आयोजना लगानी, उत्पादन लागत र शेयर मूल्यको स्थायित्वका विषयमा जिज्ञासा राखेका थिए।
अधिकांश शेयरधनीहरूले कम्पनीको निरन्तर प्रगति, पारदर्शी वित्तीय व्यवस्थापन र दिगो दृष्टिकोणको प्रशंसा गर्दै आगामी वर्षमा थप लाभांश वितरणको अपेक्षा व्यक्त गरे।
उठाइएका प्रश्नहरूको उत्तर अध्यक्ष श्रेष्ठ, प्रमुख कार्यकारी अधिकृत र लेखा विभागका प्रतिनिधिहरूले क्रमशः दिएका थिए।
श्रेष्ठले शेयरधनीहरूको सुझावलाई मूल्यवान् ठहर गर्दै भने, “सानिमा मिडिल तमोरको मुख्य लक्ष्य स्थायी ऊर्जा उत्पादन र शेयरधनीलाई दिगो प्रतिफल प्रदान गर्नु हो। पारदर्शिता, दिगोपन र दक्ष व्यवस्थापनमा नै हाम्रो सम्पूर्ण प्रयास केन्द्रित छ।”
आगामी योजना र नयाँ आयोजना
सभामा कम्पनीका लेखापरीक्षकले वित्तीय अवस्था सन्तोषजनक रहेको उल्लेख गर्दै आन्तरिक नियमन सुदृढीकरणका सुझाव प्रस्तुत गरे।
त्यसैगरी, कम्पनीले निकट भविष्यमा पूर्वी नेपालका अन्य सम्भावित जलस्रोतहरूमा लगानी गर्ने योजना बनाएको र वातावरणीय प्रभाव मूल्यांकनपछि नयाँ परियोजना सुरु गर्ने तयारीमा रहेको जानकारी दिइयो।
समापन कार्यक्रममा अध्यक्ष श्रेष्ठले सबै शेयरधनी, लगानीकर्ता र सरोकारवालाहरूलाई धन्यवाद दिंदै भने, “सानिमा मिडिल तमोर हाइड्रोपावर केवल ऊर्जा उत्पादक कम्पनी होइन, यो नेपालको ऊर्जाक्षेत्रमा दिगो योगदान दिने अभियान हो। तपाईंहरूको विश्वास र साथले कम्पनी अझ उचाइमा पुग्नेछ।”
यससँगै सानिमा मिडिल तमोर हाइड्रोपावर लिमिटेडको दशौं वार्षिक साधारण सभा सफलतापूर्वक सम्पन्न भएको घोषणा गरिएको थियो।
