काठमाडौं । यस वर्षको तिहारमा कुनै ठुलो मौसमी प्रणालीको प्रभाव नरहे पनि पश्चिमी वायुको सामान्य प्रभावले देशका पहाडी भू–भागमा आंशिकदेखि सामान्य बदली हुने सम्भावना रहेको मौसम पूर्वानुमान महाशाखाले जनाएको छ । महाशाखाको शनिवारको बुलेटिनअनुसार पहाडी क्षेत्रका एक–दुई स्थानमा हल्का वर्षा र उच्च हिमाली भू–भागमा हल्का हिमपातको सम्भावना छ ।
तिहारका विभिन्न दिनको मौसम पूर्वानुमान निम्नानुसार छः
कार्तिक ३ गते (लक्ष्मी पूजा)
लक्ष्मी पूजाको दिन पहाडी भू–भागमा आंशिक बदली रहनेछ । कोशी, बागमती, गण्डकी र कर्णाली प्रदेशका पहाडी क्षेत्रका एक–दुई स्थानमा हल्का वर्षाको सम्भावना छ ।
कार्तिक ४ गते
यो दिन पहाडी भू–भागमा आंशिक बदली रहने र बाँकी क्षेत्रमा मौसम सामान्यतया सफा रहने महाशाखाले जनाएको छ । कोशी, गण्डकी र कर्णाली प्रदेशका पहाडी क्षेत्रमा एक–दुई स्थानमा हल्का वर्षाको सम्भावना कायम रहनेछ ।
कार्तिक ५ गते (गोवर्धन पूजा)
गोवर्धन पूजाको दिन पहाडी भू–भागमा आंशिकदेखि सामान्य बदली रहनेछ भने बाँकी क्षेत्रमा मौसम मुख्यतया सफा रहनेछ । कोशी र कर्णाली प्रदेशका उच्च पहाडी तथा हिमाली क्षेत्रका एक–दुई स्थानमा हल्का वर्षा वा हिमपात हुन सक्छ ।
कार्तिक ६ गते (भाइटीका)
भाइटीकाको दिन कोशी, मधेश र अन्य पहाडी भू–भागमा आंशिकदेखि सामान्य बदली रहनेछ । बाँकी क्षेत्रमा मौसम सामान्यतया सफा रहनेछ । सबै प्रदेशका पहाडी क्षेत्रका एक–दुई स्थानमा हल्का वर्षा र उच्च पहाडी तथा हिमाली क्षेत्रमा हल्का वर्षा वा हिमपातको सम्भावना छ ।
